လျှပ်စစ်လုပ်သား အမေးအဖြေ
# **လျှပ်စစ်စစ်ဆေးရေးနှင့်ပတ်သက်သည့်မေးခွန်းများ**
***(မူရင်း စက်မှုကြီးကြပ်ရေးနှင့်စစ်ဆေးရေးဦးစီးဌာနဝက်ဘ်ဆိုဒ်)***
**မေး။ လျှပ်စစ်လုပ်ငန်းလုပ်ကိုင်ရန်အတွက် လျှပ်စစ်ကျွမ်းကျင်မှုမှတ်ပုံတင်လက်မှတ် လိုအပ်ပါသလား။**
ဖြေ။ လျှပ်စစ်ဥပဒေ (၂၀၁၄)၊ ပုဒ်မ ၄၆ အရ လျှပ်စစ်လုပ်ငန်းဆောင်ရွက်သူအားလုံး လျှပ်စစ်ကျွမ်းကျင်မှုဆိုင်ရာလက်မှတ် လိုအပ်ပါသည်။
**မေး။ လျှပ်စစ်ကျွမ်းကျင်မှုမှတ်ပုံတင်လက်မှတ် အမျိုးအစားနှင့်အဆင့်များကို ဖော်ပြပါ။**
ဖြေ။ လျှပ်စစ်ကျွမ်းကျင်မှုဆိုင်ရာလက်မှတ် အမျိုးအစား(၃)မျိုး၊
အဆင့်(၃)ဆင့် ရှိပါသည်။
အမျိုးအစားများမှာ
**ပြင်ပလျှပ်စစ်ကျွမ်းကျင်မှုဆိုင်ရာလက်မှတ်၊**
**ဌာနဆိုင်ရာလျှပ်စစ်ကျွမ်းကျင်မှုဆိုင်ရာလက်မှတ်၊**
**ကိုယ်ပိုင်လျှပ်စစ်ကျွမ်းကျင်မှုဆိုင်ရာလက်မှတ်**ဟူ၍
အမျိုးအစား(၃)မျိုးဖြစ်၍
အဆင့်များမှာ
**ဒုတိယဆင့်၊**
**ပထမဆင့်၊**
**အထူးဆင့်**ဟူ၍ အဆင့် (၃)ဆင့် ရှိပါသည်။
**မေး။ လျှပ်စစ်ကျွမ်းကျင်မှုအမျိုးအစားအလိုက် လျှောက်ထားရမည့် နည်းလမ်းများကို ဖော်ပြပါ။**
ဖြေ။
(က) တည်ဆဲလျှပ်စစ်ဥပဒေဆိုင်ရာ လုပ်ထုံးလုပ်နည်းများ အပိုဒ် ၁၇၆ နှင့်အညီ ပြင်ပလျှပ်စစ်ကျွမ်းကျင်မှုဆိုင်ရာလက်မှတ် လျှောက်ထားလိုပါက သက်ဆိုင်ရာမြို့နယ်၊ ခရိုင်လျှပ်စစ်အင်ဂျင်နီယာမှတဆင့် သက်ဆိုင်ရာလျှပ်စစ်စစ်ဆေးရေးဌာနမှ ကိုယ်စားလှယ်ပါဝင်သော လျှပ်စစ်ကျွမ်းကျင်မှုအရည်အချင်းစိစစ်ရေးအဖွဲ့နှင့် အရည်အချင်းစိစစ်ပြီးမှ သက်ဆိုင်ရာတိုင်းဒေသကြီး လျှပ်စစ်အင်ဂျင်နီယာမှထပ်ဆင့်စိစစ်ထောက်ခံပြီးလျှင် စစ်ဆေးရေးမှူးချုပ်၊ လျှပ်စစ်စစ်ဆေးရေးဌာနသို့ ဆက်လက်ပေးပို့သွားရမည် ဖြစ်ပါသည်။
( ခ) တည်ဆဲလျှပ်စစ်ဥပဒေဆိုင်ရာ လုပ်ထုံးလုပ်နည်းများ အပိုဒ် ၁၇၇၊ ၁၇၈ နှင့်အညီ ဌာနဆိုင်ရာနှင့်ကိုယ်ပိုင် လျှပ်စစ်ကျွမ်းကျင်မှုဆိုင်ရာလက်မှတ် ရရှိရန်အတွက် စစ်ဆေးရေးမှူးချုပ်ထံ တိုက်ရိုက်လျှောက်ထားရမည်ဖြစ်ပါသည်။ အရည်အချင်းစစ်ဆေးပြီး လျှပ်စစ်ကျွမ်းကျင်မှုဆိုင်ရာလက်မှတ် ထုတ်ပေးမည်ဖြစ်ပါသည်။
**မေး။ လျှပ်စစ်ကျွမ်းကျင်မှုမှတ်ပုံတင်လက်မှတ်အမျိုးအစားမှာ မည်သည့်အပေါ်မူတည်၍ ခွဲခြားထားပါသနည်း။**
ဖြေ။
(က) ပြင်ပလျှပ်စစ်ကျွမ်းကျင်မှုဆိုင်ရာလက်မှတ်ဆိုသည်မှာ လျှပ်စစ်ဓာတ်အားဖြန့်ဖြူးရေးလုပ်ငန်း၏ မြို့နယ်လျှပ်စစ်အင်ဂျင်နီယာရုံးစာရင်းဝင် ပြင်ပလျှပ်စစ်ကျွမ်းကျင်လုပ်သားများအတွက် ဖြစ်သည်။
( ခ) ဌာနဆိုင်ရာလျှပ်စစ်ကျွမ်းကျင်မှုဆိုင်ရာလက်မှတ်ဆိုသည်မှာ ဌာနဆိုင်ရာဝန်ထမ်းများအတွက် ဖြစ်သည်။
( ဂ) ကိုယ်ပိုင်လျှပ်စစ်ကျွမ်းကျင်မှုဆိုင်ရာလက်မှတ်ဆိုသည်မှာ ကိုယ်ပိုင်လျှပ်စစ်လုပ်ငန်းဆောင်ရွက်သူများနှင့် ပုဂ္ဂလိကပိုင်စက်ရုံ၊ အလုပ်ရုံများတွင် လျှပ်စစ်လုပ်ငန်းဆောင်ရွက်သူများအတွက် ဖြစ်ပါသည်။
**မေး။ လျှပ်စစ်ကျွမ်းကျင်မှုမှတ်ပုံတင်လက်မှတ်လျှောက်ထားရန် လိုအပ်သည့်အချက်အလက်များကို ဖော်ပြပါ။**
ဖြေ။ လျှပ်စစ်ကျွမ်းကျင်မှု လျှောက်လွှာပုံစံ၊ ပညာအရည်အချင်းထောက်ခံချက်၊ ဌာနဆိုင်ရာဝန်ထမ်းများအတွက် ဝန်ထမ်းဖြစ်ကြောင်းနှင့် လျှပ်စစ်လုပ်ငန်းလုပ်ကိုင်ကြောင်း ဌာနအကြီးအကဲ၏ထောက်ခံချက်၊ မှတ်ပုံတင်မိတ္တူ၊ သက်ဆိုင်ရာနေရပ်လိပ်စာတွင် အမှန်နေထိုင်ကြောင်းထောက်ခံချက်နှင့် ဓာတ်ပုံ(၂)ပုံတို့ လိုအပ်ပါသည်။
Comments
Post a Comment