"Generator kVA/kW တွက်ချက်ခြင်း''

 

"Generator kVA/kW တွက်ချက်ခြင်း''

ကျွန်တော်တို့ Generator တစ်လုံးဝယ်ရင် kVA/kW ကိုအနီးစပ်ဆုံး အဆင်ပြေအောင် ဘယ်လိုတွက်ချက်ကြမလဲ??

Generator ဆိုတာကတော့ လူတိုင်းသိပြီးသား ပစ္စည်းတစ်ခုဖြစ်ပါတယ်။ Mechanical Energy ကို Electrical Energy အဖြစ်ပြောင်းပေးတဲ့ ပစ္စည်းတစ်ခုပါ။ တစ်နည်းအားဖြင့် Electricity ကို generate လုပ်ပေးတဲ့အတွက် Generator လို့ ခေါ်ကြခြင်းလဲ ဖြစ်ပါတယ်။

Generator တွေမှာ output power ကို kVA တွေနဲ့ ပြလေ့ ရှိပါတယ်။ kVA တန်ဖိုးကြီးလာတာနဲ့အမျှ Generator ရဲ့ စျေးလဲ ကြီးလာမှာ ဖြစ်ပါတယ်။ ဥပမာ 20kVA၊ 45kVA အစရှိသဖြင့်ပေါ့လေ။ 45kVA မို့လို့ သူ့ရဲ့Output Power ကို 45kW ထွက်မယ်လို့ အမှတ်မှားတတ်ကြပါတယ်။ တကယ့်လက်တွေ့မှာတော့ 45kVA မီးစက်တစ်လုံးဟာ 45kW မထွက်ပါဘူး။ 45kVA ကို Apparent Power လို့ခေါ်ပါတယ်။

Power factor = Effective Power ÷ Apparent Power 

ဆိုတဲ့ ပုံသေနည်းနဲ့ ရှင်းမှ တကယ်သုံးနိုင်မဲ့ kW ထွက်လာမှာပါ။

သူပေးထားတဲ့ 45kVA ကို power factor တန်ဖိုး 0.8 နဲ့ မြှောက် (×) လိုက်မယ်ဆိုရင်တော့ တကယ်အသုံးပြုနိုင်မဲ့ kW ကိုရမှာဖြစ်ပါတယ်။

45kVA × 0.8 = 36kW ကိုသာ တကယ်အသုံးပြုနိုင်မှာပါ။ 36kW ကိုတော့ Effective Power လို့ခေါ်ကြပါတယ်။

အချို့ 50Hz, 60Hz နှစ်မျိုးသုံးနိုင်တဲ့ မီးစက်တွေမှာဆိုရင် တစ်မျိုးပြန်တွက်ရမှာ ဖြစ်ပါတယ်။ ဥပမာ 45kVA မီးစက်ဆိုရင် 60Hz မှာမှ 45kVA ရတယ်လို့ ဆိုလိုတာ ဖြစ်ပါတယ်။

ကျွန်တော်တို့ မြန်မာနိုင်ငံဟာ 50Hz ကိုသာ သုံးတဲ့အတွက် 50Hz အတွက် kVA ကိုရအောင် အရင်တွက်ရပါမယ်။ သုံးချက်တွက်နည်းနဲ့ တွက်လို့ရပါတယ်။

For 60Hz >>> 45kVA

For 50Hz >>> ???

(50×45) ÷ 60 = 37kVA ထွက်လာပါတယ်

အဲ့ဒီ 37kVA ကိုမှ Power Factor တန်ဖိုး 0.8 နဲ့ ထပ်မြှောက်ပေးရမှာပါ။

37kVA × 0.8 = 29.6kW

50Hz တစ်မျိုးတည်းသာ သုံးနိုင်တဲ့ 45kVA မီးစက်ဝယ်မယ်ဆိုရင်တော့ 36kW ကို အမှန်တကယ် သုံးနိုင်မှာ ဖြစ်ပါတယ်။

50Hz နဲ့ 60Hz နှစ်မျိုးသုံးနိုင်တဲ့ 45kVA မီးစက်တစ်လုံးကို ဝယ်မယ်ဆိုရင်တော့ 29.6kW သာ အမှန်တကယ် အသုံးပြုနိုင်မယ်လို့ဆိုလိုပါတယ်။

အိမ်သုံး/လုပ်ငန်းသုံးပစ္စည်းတွေရဲ့ Watt တန်ဖိုးတွေကို ပေါင်းပြီး Generator တစ်လုံးကိုရွေးချယ်တဲ့အခါမှာလည်း အချို့သော ပစ္စည်းများဟာ ရှိရင်းစွဲ Watt တန်ဖိုးထက် ပိုပြီးတွက်ပေးရတာကို သိထားရပါမယ်။

Fluorescent Light (အိမ်သုံးမီးချောင်း)တွေဆိုရင် မူလတန်ဖိုးရဲ့ ၂ဆ (သို့) ၃ဆ နဲ့တွက်ရပါတယ်။

အုတ်ဖောက်တဲ့ Gun ( Drilling Machine) တွေဟာလဲ ၂ဆ (သို့) ၃ဆနဲ့ တွက်ပေးရမှာပါ။

Motor, Compressor တို့လို Starting Ampere များတဲ့ ပစ္စည်းတွေကိုတော့ မူလ Watt တန်ဖိုးထက် ၃ဆ (သို့) ၅ဆ ပိုတွက်ပေးရပါတယ်။

ဥပမာ - ၄ပေမီးချောင်းဆယ်ချောင်း၊ မော်တာ 10000 Watt သုံးလုံး အတွက် သင့်တော်မဲ့ kVA ကိုတွက်ပါဆိုရင်

* ၄ပေ မီးချောင်း မူလ Watt - 40W × 2 = 80W

တစ်ချောင်းကို 80W နဲ့ အနည်းဆုံးတွက်ပေးသင့်ပါတယ်။ ဆယ်ချောင်းဆို 800W ရပါမယ်

* 10000W မော်တာတစ်လုံးအတွက် အနည်းဆုံး 30000W တွက်ပေးရပါမယ်။ သုံးလုံးဆိုရင် 90000W ရပါမယ်

90000W + 800W = 90800W ~ 91kW

91kW ÷ 0.8 (power factor) = 113.75kVA

၄ပေမီးချောင်းဆယ်ချောင်းနဲ့ 10000W မော်တာသုံးလုံးအတွက် သင့်တော်မဲ့ kVA ကတော့ 113.75 kVA လို့ပြောနိုင်ပါတယ်။

သိုပေမဲ့ ဒီ kVA ပမာဏဟာ safe မဖြစ်သေးပါဘူး။ Generator ရောင်း/ငှါး လုပ်ကြတဲ့ ကုမ္ပဏီတွေက safe ဖြစ်စေဖို့အတွက် 113.75 kVA ရဲ့ 20%ကို ထပ်မံပေါင်းထည့်လေ့ ရှိကြပါတယ်။

20% of 113.75 kVA = 22.75kVA

113.75 + 22.75 = 136.5kVA

နောက်ဆုံးအနေနဲ့ ၄ပေမီးချောင်း ဆယ်ချောင်းနဲ့ 10000W မော်တာ သုံးလုံးအတွက် သင့်လျော်သော မီးစက်မှာ 136.5 kVA မီးစက်ဖြစ်ပါတယ်။

ဒီလောက်ကတော့ အကြမ်းဖျင်းသဘောတရားလေးပါ။

ကျွန်တော်လဲ သိပ်မကျွမ်းကျင်လို့ ရေးထားတာ အမှားများပါခဲ့ရင် ကျွမ်းကျင်ပညာရှင်တွေအနေနဲ့ ဝေဖန်ထောက်ပြ အကြံပြုနိုင်ပါတယ်ခင်ဗျာ။

ဆရာများ၊ Senior များနဲ့ လူတော်များကို အစဉ်လေးစားလျက်

AriZoNiA_Mec H